Barometri global për korrupcionin i publikuar nga Transparency International për vitin 2007 thekson praninë e korrupcionit në një nivel mesatar në Maqedoni. Në Evropën Juglindore vendi lider i korrupcionit është Shqipëria, pastaj vijnë Bosnjë Hercegovina dhe në vendin e tretë Kroacia.

Sipas anketës së kësaj organizate, 61 për qind e qytetarëve në Maqedoni kanë shprehur besimin e lartë tek përpjekjet e Qeverisë në luftën e saj kundërkorrupcionit.

Sipas raportit, thuajse gjysma e qytetarëve në Maqedoni patjetër duhet të japin mito dhe korrupcion për të realizuar të drejtën e tyre. Arsimi, shëndetësia dhe gjyqësori janë institucionet më të korruptuara, vlerësojnë qytetarët e Maqedonisë. Pas këtyre, vijojnë, partitë politike, Parlamenti, sektori privat, Drejtoria e Tatimeve, Mediat, trupat rregullatore të qeverisë, organizatat joqeveritare dhe policia.

"Këto të dhëna dëshmojnë problemet e njohura me korrupcionin në gjyqësor dhe sektorët e tjerë institucional dhe shoqëror. Është mëse e nevojshme ndërmarrja e masave për parandalimin e këtyre dukurive.Edhe pse gjatë viteve të kaluara ka pasur ulje të nivelit të perceptimit për korrupcionin në Polici, hulumtimi i fundit tregon se policia është e korruptuar në mënyrë ekstreme", thuhet në raportin e Transparency International.

Në Evropën Juglindore vendi lider i korrupcionit është Shqipëria, pastaj vijnë Bosnjë Hercegovina dhe në vendin e tretë Kroacia. Maqedonia është në vendin e katërt, ndërsa pas saj janë Kosova dhe Serbia. Ndërsa vendi më pak i korruptuar është Turqia. Raporti i Transparency International është publikuar me rastin e 9 dhjetorit - Ditës Ndërkombëtare kundër Korrupcionit.