Nebi MËRSELI- Kjo që i ndodhi Maqedonisë nuk është për keqardhje. Është epilog i pritur. Është pasojë e krenarisë së rrejshme, të ngritur në ortekun e historisë së përmbysur. Kreatura shtetërore e Maqedonisë nuk ia diti hallin vetes deri të mërkurën, kur u ndal anëtarësimi në NATO. Cërvenkovski, Gruevski dhe krejt establishmenti politik maqedonas duhen të ulën e qesin gishtin në kokë. Të shtrijnë këmbët sa e kanë jorganin. E jo të improvizojnë me emocione për shtet. Le të pozojë tash Gruevski sa të dojë para Lekës së Madh. Grekët dëshmuan se janë të vendosur në politikë. Nuk lëshuan pe për emrin dhe janë shembull se si duhet vepruar në konteste diplomatike.

Për keqardhje janë shqiptarët e Maqedonisë. Nevzat Halili, Abdurrahman Aliti, Arbën Xhaferi, Ali Ahmeti, Menduh Thaçi dhe së fundi Bardhyl Mahmuti, nuk arritën Maqedoninë ta bëjnë tamam shtet siç e duan shqiptarët, por shtet siç e donin maqedonasit dhe këta politikanë shqiptarë. U bë edhe lufta dhe gama mentale e maqedonasve nuk ndryshoi. Ata e përmbysën edhe këtë luftë dhe vazhduan me avazin e vjetër duke korruptuar politikisht shqiptarët. Por, dushi i ftohtë i Bukureshtit, ndoshta do t’i kthjellojë dhe esëll të veprojnë në të ardhmen. Njohja e pavarësisë së Kosovës dhe përmbushja e obligimeve të Marrëveshjes së Ohrit janë gjërat që brenda natës duhet kryer. Dhe çështjes së emrit përfundimisht duhet vënë kapakun. Janë dy opsione të pranueshme. S’kanë më çfarë qesin brirë maqedonasit. Tash, po të ishin shqiptarët të mençur, kanë rastin të kushtëzojnë maqedonasit për çështjet e kamotshme të pazgjidhura. Tash duhet PDSH-ja të dalë nga qeveria. Ka arsye të mëdha. Ndërsa BDI-ja mund të mbledhë mend e të mos bëjë vrap pas Gruevskit dhe Cërvenkovskit. Kundërshtari sulmohet kur është më i dobët. Edhe në politikë vlen ky parim. Kuptohet jo për të çuar ujë në mullirin grek, por për të arritur qëllimet e shqiptarëve, të cilët janë deklaruar se duan të jetojnë në këtë shtet të brishtë, por me barazi të plotë. Në situatën e lënduar dhe të palakueshme që e kanë maqedonasit, pozicioni lëndues mund të jetë edhe më goditës, ngase grekët me mekanizmin e vetos vazhdimisht do të kenë përparësi të madhe. Edhe nëse Maqedonia shpëton nga vetoja për anëtarësim në NATO pa e ndërruar emrin, atëherë e pret vetoja tjetër – në Bashkimin Evropian. Shqiptarët nuk duhet të bëjnë sehir në këto që po ndodhin. Por, presionin duhet shtuar. Tekefundit, shqiptarët asgjë nuk kanë humbur. Le të mendojnë për këtë dështim maqedonasit. Le të mendojnë për dështime të radhës. Natyrisht, nëse nuk mbushen mend.