Mjaftuan pak minuta për të mbyllur historinë e brazilianit Ronaldinjo me klubin katalanas, Barcelonën, pas muajsh të tërë acarimesh dhe polemikat me asin brazilian.

Ekipi Blaugrana u limitua në vetëm pak fjalë për t'i shpjeguar agjentit dhe vëllait të futbollistit, Roberto de Asis që në programet e ardhshme nuk parashikohej emri i Ronaldinjos, dhe se ai duhet të gjejë një vend tjetër. Zyrtarizimi i divorcit mes palëve pasqyrohet në të përditshmen "Sport" që është shumë pranë Barcelonës dhe që sqaron se në plan të parë tash gjendet skuadra e Milanit për të afruar numrin 10 të katalanasve. Berluskoni ka thënë disa herë se Ronaldinjo ka zgjedhur Milanin nëse do ti jepte fund aventurës me Barcelonën dhe tashmë kjo ka ndodhur. Në favor të tij është kolonia e brazilianëve që ndodhet tek kuq e zinjtë dhe do ti garantonte një samba të vërtetë dhe në Seria A. Por një e ardhme me 5 yje për brazilianin nuk garantohet vetëm nga "kuq e zinjtë" Edhe skuadra tjetër nga Milano, Interi janë gati për të joshur talentin, ndërsa nga ana tjetër janë milionat e ofruara nga Mançester City.