Nga Izet Fejzullai- Një arsye pse votuesit shqiptar i shohin partitë politike me një skepticizëm të tillë është sepse ata perceptohen si “parajsa të sigurta” për interesat e ngushta të pak të zgjedhurve.

Nëse partitë politike duan të kenë organizime të suksesshme për t’i bërë thirrje votuesve, ata duhet të forcojnë perceptimin se ata nuk janë për grindjet personale të pak të zgjedhurve. Dhe këtë mund ta bëjnë krejt thjesht duke u lejuar anëtarëve të kandidojnë për pozicionet e udhëheqjes apo të urdhërojnë të drejtën për zgjedhjen e udhëheqësve të tyre.

Në përgjithësi, asnjë parti politike nuk deklaron se është jodemokratike. Demokracia është bërë një ide aq tërheqëse sa edhe vetë sunduesit ushtarakë dhe diktatorët civilë janë të gatshëm të deklarojnë përkushtimin e tyre për parimet demokratike. Megjithatë, në një parti politike, demokracia nuk mund të lulëzojë pasi është e ndaluar. Në fakt, demokracia e brendshme në parti mund të kompromentohet nga faktorë të tillë si manaxhimi dhe strukturat e ngushta të komunikimit; mungesa e ndryshimit të udhëheqësisë; dhe margjinalizimi i anëtarëve të partisë. Shpesh këto faktorë krijojnë një situatë në të cilën pak individë mbizotërojnë në çështjet e partisë pa marrë parasysh anëtarësinë e gjerë. Një situatë e tillë pengon përfshirjen dhe mundësinë e anëtarëve për të dhënë mendim për politikat e partisë.

Angazhimi i partisë në parimet e demokracisë duhet të pasqyrohet jo vetëm në statutin e saj të shkruar, por edhe këndërveprimin e përditshëm midis drejtuesve dhe anëtarëve. Kështu një parti mund të angazhohet në praktikimin e sjelljes demokratike. Një parti do të:

• Lejojë anëtarët të shprehin këndvështrimet e tyre lirisht,
• Përkrahë anëtarësimin e femrave,
• Nxisë pjesëmarrjen e të gjithë anëtarëve,
• Jetë tolerante ndaj ideve të ndryshme,
• Bindet rregullave dhe procedurave të vendim-marrjes.

Mënyra kryesore për të siguruar mbështetjen e njerëzve për partinë tuaj është duke i bindur ata që partia juaj interesohet për problemet që ata kanë dhe ndan me ta të njëjtat shqetësime për vendin dhe për të ardhmen e tij duke i’u shpjeguar që partia juaj ka një plan për të përmirësuar jetët e tyre dhe për të ndrequr problemet e vendit e jo duke share dhe duke ofenduar njeri-tjetrin.

Partit politike shqiptare, në vend se që dergojnë mesazhe respekti dhe progresi me të cilin do të informonin anëtarësinë e tyre dhe shoqërinë në përgjithësi, ata nxisin probleme edhe aty ku nuk ekzistojne, vetem e vetem qe të kenë me se të merren në mungesë të projekteve konkrete të cilat do të duhej t`ua ofrojnë zgjedhësve të tyre.

Pra, le të presim në ditët në vijim ofertat konkrete të partive politike shqiptare për zgjidhjen reale të problemeve në trevat tona, se me zënka dhe ofendime jemi ngopur më aq shumë sa që edhe vetë barcaletat dhe anekdotat kur dalin nga goja e politikanëve na duken si filma horor.

Të mbetemi me shpresë se do të mbisundojë mirësia dhe respekti i ndërsjellë, se dashuria ndërvëllazërore në politikë na duket e pamundur në ditët tona!

Le të shkojë në theqafje faraonizmi së bashku me servilët dhe pakurizorët e këtyre viseve, se besa e paguam shumë shtrenjtë!