Banka e Anglisë pritet që të njoftojë sot (e hënë) një plan për të hedhur rreth 100 miliardë dollarë në sistemin bankar britanik. Ky hap shihet në kuadrin e përpjekjeve për ta ndihmuar përballimin e pasojave të krizës së kredive të shtëpive në SHBA.

Këtë veprim të Bankës së Anglisë disa e shohin si një nga kthesat më të mëdha në historinë 300 vjeçare të saj. Sipas planit, bankat do të kenë akses në një fond financiar rezervë për një periudhë tre vjeçare. Në fazën e parë bankave do t'iu jepen rreth 50 miliardë stërlina (afro 100 miliardë dollarë). Një masë e tillë merret për të parandaluar pasojat që mund të ketë kriza aktuale e kredive në sistemin bankar dhe në ekonominë e vendit.