Në Bibliotekën Kombëtare në Tiranë do të festohet sot Dita Botërore e Librit. Ky institucion në bashkëpunim me Ministrinë e Turizmit, Kulturës, Rinisë dhe Sporteve do të organizojnë një ceremoni të veçantë, ku do të marrin pjesë shkrimtarë, botues, studiues, njerëz të letrave, etj.

Mësohet se në këtë ceremoni, ministri i Kulturës Ylli Pango do të dorëzojë trofeun e Çmimit Kombëtar të Bibliofilisë "Lumo Skëndo", për botimin më të mirë të vitit. Data 23 prilli, dita e cila kujtohet në të pesë kontinentet, si Dita Botërore e Librit, është caktuar nga UNESCO në nderim të shkrimtarit të shquar anglez, Shekspir, pasi me 23 prill ai ka ditën e lindjes. Në këtë ditë ka vdekur Miguel Servantes dhe Inca Garcialaso de la Viega. Po në këtë datë kanë lindur edhe mjaft shkrimtarë të shquar, si Maurice Druon, K. Laxnes, Vladimir Nabukov, Josep Pla dhe Manuel Mejia Vallejo. Që nga viti 2002, edhe Shqipëria fillimisht me nismën e Bibliotekës sonë Kombëtare dhe e pasuar nga institucionet e tjera kulturore e arsimore të vendit, etj, i është bashkëngjitur dhjetëra vendeve të tjera të botës për festimin e kësaj dite të shënuar të dijes, e cila është pjesë e kalendarit kulturor botëror. Në vende të ndryshme, në këtë ditë feste të librit, që përfshin natyrshëm të gjithë moshat e nivelet e shoqërisë, dashamirës e adhurues të librit, kanë gjetur mënyra origjinale për ta festuar. Kështu, në Spanjë, të frymëzuar nga tradita e bukur katalane, është jetësuar nisma speciale me sloganin "Dhuro një libër, dhuro një trëndafil", Në Norvegji, "Duke lexuar në librari", në Francë, "Duke lexuar nëpër rrugë", në Afrikë, "Për leximin publik", ku vullnetarët e rinj u lexojnë libra të sëmurëve, të moshuarve, të verbërve në shtëpitë e tyre, etj.