Përzgjedhësi i kombëtares së Anglisë, Fabio Kapello, ka pohuar se Dejvid Bekami mund të luajë në Kampionatin botëror-2010 në Afrikën e Jugut, në rast se arrin të ruhet nga lëndimet.

"Për Dejvidin dyert janë të hapura. Ai ka luajtur mjaft mirë në ndeshjen ndaj Francës, kurse nganjëherë e shikoj edhe kur luan në Amerikë për skuadrën e tij, Los Anxhelos Galaksi", ka pohuar Kapello. "Ka shumë futbollistë, të cilët luajnë në moshën 33 dhe 34 vjeçe. Ata e kuptojnë se nuk janë fizikisht sa duhet të përgatitur si më parë dhe për këtë arsye i kushtojnë vëmendje shëndetit, ngase janë të vetëdijshëm se gjithçka rreth karrierës së mëtejshme varet nga shëndeti i tyre. Nëse Bekami nuk do të ketë lëndime në të ardhmen, atëherë sigurisht se do të luajë edhe në Botërorin-2010", ka shtuar strategu italian.