Kapiteni i Chelseat, John Terry, ende është i bindur se Chelsea mund ta sigurojë titullin e Premierligës, dhe mendon se Manchester United do të “rrëshqasë” në dy ndeshjet e fundit.

Chelsea fitoi me rezultat 2-1 ndeshjen e së shtunës përballë Manchester United në Stamford Bridge, që i lejoi blutë të barazohen në pikë me Djajtë e Kuq, në krye të tabelës së Premierligës, kur kanë mbetur vetëm edhe dy ndeshje deri në fund të sezonit.

Chelsea duhet të udhëtojë tek Newcastle më 5 maj, para se t’i japë fund sezonit në shtëpi përballë Boltonit, derisa United do të presë West Hamin, para se të udhëtojë tek Wigani.

“Unë ende besoj se mund ta fitojmë titullin. Le të shohim tash si do të reagojnë ata. Ne jemi të sigurt se mund t’i fitojmë dy ndeshjet tona të ardhshme. A janë edhe ata të sigurt?”, ka pyetur Terry.

“Chelsea nuk mund ta fitojë? Le të shohim. Mos vëni bast kundër nesh. Kemi nevojë të tregojmë se mund t’i tejkalojmë kohët e vështira. Duhet të besojmë se United do të gabojë”, ka shtuar mbrojtësi anglez.