Një gol i hershëm i shënuar nga Paul Scholes, ishte i mjaftueshëm t’i sjellë fitoren minimale Manchester Unitedit, duke eliminuar kështu ekipin e Barcelonës në gjysmëfinale të Ligës së Kampionëve.

Ndeshja u shoqërua me mjaft raste nga të dyja ekipet, me një start dhe përfundim më insistues nga mysafirët spanjoll. Goli i Scholes erdhi pas 14 minutash lojë, duke e bërë kështu Manchesterin finalistin e parë të Ligës së Kampionëve të këtij sezoni. Ndeshja e parë mes dy ekipeve, e luajtur në Camp Nou gjatë javës së kaluar, pati përfunduar me barazim pa gola.

Me këtë kualifikim, djajtë e kuq mbeten në garë për dy tituj të mëdhenj, përfshirë edhe Premierligën, ku janë liderë, por me pikë të barabarta me Chelsean.

Ekipi tjetër i cili do të udhëtojë në finalen e Moskës, do të zgjidhet nesër, në ndeshjen e nesërme në Stamford Bridge në mes dy ekipeve angleze, Liverpoolit dhe Chelseat, të cilët në ndeshjen e parë të luajtur në Anfield, barazuan 1-1.