Kapiteni i Chelseat, John Terry, ka kërkuar të mos ketë më arsyetime dhe të mos e bëjnë gabimin e tretë kundër Liverpoolit në gjysmëfinalen e Ligës së Kampionëve.

“Nuk ka më arsyetime, le ta eliminojmë Liverpoolin”, ky është mesazhi të cilin kapiteni i Bluve, John Terry, ua ka drejtuar bashkëlojtarëve të tij për takimin e natës së sotme në Stamford Bridge kundër Liverpoolit.

“Ne kemi pasur lojtarët dhe mundësitë ta eliminojmë Liverpoolin edhe në gjysmëfinalet e mëparshme, prandaj le të bëjmë këtë tani dhe të mos arsyetohemi më”, ka thënë Terry për Daily Mail.

“Kemi biseduar së tepërmi këto katër vitet e fundit, ndërsa kjo është mundësia e fundit që t’i realizojmë fjalët dhe ta mposhtim Liverpoolin. Jemi thuajse të njëjtët lojtarë dhe nuk kemi asnjë arsye të mos fitojmë sonte. Si një lojtar dëshiroj ta fitoj këtë ndeshje dhe trofeun e Ligës së Kampionëve pasi jam në fund të karrierës sime, po këtë gjë e kërkojnë edhe tifozët tanë”, ka thënë mbrojtësi anglez.