Rita Ora Sahatçiu, një këngëtare kosovare pak e njohur, pritet të jetë befasia më e re në mesin e yjeve shqiptare, e cila për albumin e saj është duke punuar së bashku me kompozitorët e yllit britanik të muzikës Craig David.

Rita Ora ka kënduar edhe krahas Craig David në albumin e fundit të tij. Fjala është për këngën "Awkward" të albumit të ri "Trust me", ndërsa edhe vetë Craig David ka thënë se është mahnitur nga talenti i saj dhe se është duke punuar në albumin e saj.

“Albumi do të del në vitin 2009. Nuk dua të ngutem, dua të del sa më mirë që mundet”, ka thënë 17-vjeçarja, për emisionin “Projekti Londër” të BBC. “Stili i muzikës time nuk është r’n’b si i Craig David, por është më shumë jazz”, ka shtuar këngëtarja, e cila ka shoqëruar këngëtarin britanik edhe shumë koncerte të tij.

Rita Ora, e lindur në Prishtinë, jeton në Londër për gati 16 vite, ku u zhvendos me familjen e saj kur ishte më pak se një vjeç. Rita Ora, e cila mes yjeve botërore pëlqen zërin e Amy Winehouse, por jo sjelljen e saj, ka provuar veten edhe në film, duke marrë pjesë me një rol në filmin “Spivs”.