Figura e jetës politike dhe shoqërore shqiptare, Adem Demaçi përuroi në Tiranë romanin e tij "Albprometeu". Në roman paraqitet përvoja jetësore dhe politike e Demaçit, me stil të shkruari shumë të mirë, të kuptueshëm, plot me figura, gjuhë të qartë e të pastër.

Autori Adem Demaçi, fitues i çmimit "Saharov", kujtoi pritjen për të parë lirinë, Shqipërinë dhe Kosovën të lirë. "Unë u thërras juve të gjithëve, sikur që i thërras edhe ata që s'më dëgjojnë, që të bashkohemi në një qëllim, që të bëhemi një komb, i cili të bëhet për vete. Ne ishim komb më vete por nuk ishim komb për vete, ishim komb për të tjerët", tha Demaçi. Në takimin përurues morën pjesë shkrimtarë, publicistë, zyrtarë vendorë, ish-deputetë dhe deputetë, drejtori i Qendrës Ndërkombëtare të Kulturës "Pjetër Arbnori", Mujo Buçpapaj dhe zëvendësministri i Turizmit, Kulturës, Rinisë dhe Sporteve, Ekrem Spahia. Romani "Albprometeu" ka 150 faqe dhe është botim i Qendrës Ndërkombëtare të Kulturës "Pjetër Arbnori" në
Tiranë.