Violinistja Ina Kosturi dhe pianistja Rudina Ciko do te jene protagonistet e koncertit instrumental ne kujtim te patriotit te njohur Lef Nosi. Dy artistet do të interpretojnë vepra të vjetra shqiptare për violinë e piano, ne sallen e Akademise se Arteve

TIRANE- Studiuesi dhe patrioti i njohur Lef Nosi, një nga nënshkruesit e aktit të Pavarësisë së Shqipërisë në 28 Nëntor të vitit të 1912 dhe ministri i parë i Postë- Telegrafës, do të kujtohet sot në mbrëmje me një koncert instrumental në sallën e Akademisë së Arteve në Tiranë. Përtej interpretimit të veprave të repertorit klasik, dy protagonistet e këtij koncerti, violinistja Ina Kosturi dhe pianistja Rudina Ciko do të interpretojnë vepra të vjetra shqiptare për violinë e piano. Dy artistet do të interpretojnë për herë të parë sonatën e Fan Nolit për violinë e piano, të kompozuar në 1937 dhe pjesën që mban emrin e një personaliteti të shquar të botës muzikore shqiptare, Thoma Nasi, e titulluar "Fyelli i bariut". Sonata e Nolit është përzgjedhur edhe për faktin e miqësisë së ngushtë mes Lef Nosit dhe Fan S. Nolit. Organizatore e këtij koncerti në nderim të patriotit dhe studiuesit Lef Nosi është shoqata "Bota e Artit", me mbështetjen e Postës Shqiptare. I lindur në qytetin e Elbasanit në 9 prill të vitit 1877, Lef Nosi është një prej atyre personaliteteve që u anatemua pas Luftës së Dytë Botërore. Patrioti Nosi, një nga nënshkruesit e aktit të Pavarësisë së Shqipërisë, u dënua me vdekje dhe u pushkatua në vitin 1946.