Zenit St. Petersburg është bërë ekipi i dytë rus që në katër sezonet e fundit fiton Kupën UEFA, pasi që mposhti finalistin tjetër, ekipin skocez Glasgow Rangers, me rezultat 2-0 në finalen e luajtur në Manchester Stadium.

Igor Denisov shënoi golin e parë në minutën e 72-të, pas një loje të mirë nga Andrei Arshavin. Konstantin Zyryanov vulosi rezultatin në minutat shtesë (90’).



Rusët shmangën një penalti, pasi që Denisov kishte prekur topin me dorë në minutat e hershme të pjesës së dytë, por referi nuk akordoi nga pika e bardhë. Edhe mbrojtësi i Rangers, Kirk Broadfoot, po ashtu shmangi ndëshkimin e prekjes me dorë në pjesë të parë.

Më herët, në vitin 2005, Kupën UEFA e ka fituar edhe ekipi tjetër rus, CSKA Moska, duke u bërë edhe klubi i parë nga ky vend që fiton titullin evropian.

Rangers nuk ka fituar ndonjë titull Evropian, që nga viti 1972, kur triumfoi në Kupën e Fituesve të Kupave, pasi që mposhti Dinamon e Moskës.

Tifozët skocez ishin të pranishëm në 2/3 tretat e shkallëve të stadiumit të ekipit të Manchester Cityt, dhe më shumë se 100 000, ishin në qytet duke e përcjellë në ekranin e madh.