Sulmuesi i Chelseat, Nicolas Anelka, mendon se Blutë posedojnë krejt çka është e nevojshme për ta ngritur trofeun e Ligës së Kampionëve, ndërsa nuk e di nëse ai do të mund të luajë.

Anelka nuk është iluzionist, ai e di mirë se sa e vështirë do të jetë finalja e Moskës, mirëpo mendon se Chelsea do të mund t’i mposhtë Djajtë e Kuq, dhe ta çojë trofeun në Londër.

“Do të jetë vështirë. Man United është një skuadër e madhe me lojtarë të mëdhenj, mirëpo në një ndeshje të vetme gjithçka është e mundur. Ne jemi të bindur për fitore, siç thashë do jetë vështirë, por ne do ta kryejmë punën“, ka thënë Anelka për Setanta Sports.

I pyetur nëse ai pret të fillojë nga minuta e parë, francezi është përgjigjur: “Nuk e di, duhet ta pyesni menaxherin për këtë, mirëpo edhe nëse jam në stol dhe nëse më jepet mundësia të luaj, do të jap më të mirën nga vetja”.