Historianët thonë se me muaj të tërë nuk mund të vendosin kontakte me përfaqësues të Institutit ndaj edhe dyshojnë në ekzistencën e tij.

Shoqata e Historianëve Shqiptarë akuzon Institutin për Ruajtjen e Trashëgimisë Kulturore dhe Shpirtërore “Pjetër Bogdani: për heshtje me rastin e shpërnguljes së shtëpisë së Nënë Terezës nga qendra e qytetit, ndërsa në po të njëjtin vend po ndërtohet një Kishë Ortodokse.

Kryetari për degën e Shkupit Besnik Rameti thotë se me muaj të tërë nuk mund të vendosin kontakte me përfaqësues të Institutit ndaj edhe dyshojnë në ekzistencën e tij.

“Pyesim: Vallë ky institucion vërtetë ekziston, apo është një nga ato që themelohen vetëm për t’u fotografuar politikanët? Çfarë punësh dhe aktivitetesh ka bërë deri tani ky institucion, duke ditur shkeljet që bëhen ndaj trashëgimisë së shqiptarëve? Cili është qëllimi i ekzistimit të tij, kur shoqatat, siç është kjo e historianëve e kanë të pamundur t’u paraqesin institucioneve dëshmitë e tyre për asgjësimin e trashëgimisë sonë?”, akuzoi historiani Besnik Rameti.

Por drejtoresha e Instituti për Ruajtjen e Trashëgimisë Kulturore “Pjetër Bogdani” Mirushe Hoxha tha se Shoqata e Historianëve Shqiptarë asnjëherë nuk janë kërkuar takime. Institucioni që ajo drejton është duke vepruar. Për momentin po përpilohet monografia e Nënë Terezës, e cila do të zbardhte parregullsitë e mundshme mbi lokalitetin autentik të shtëpisë së saj.

“Derisa nuk publikohet një projekt, nuk kemi të drejtë të nxjerrim atë të drejtë autorësie në pah, të drejtën e autorësisë së autores së monografisë e Nënës Terezë, e cila jep bazën e mundësinë që më pas të veprohet në formë juridike ashtu siç duhet”, u përgjigj Mirushe Hoxha.

Historianët shqiptarë hedhin akuza mbi Institutin për mosreagim edhe ndaj kërkesës së tyre të vazhdueshme për mospërfshirje të arkeologëve shqiptarë në gërmimet arkeologjike në Kalanë e Shkupit dhe atë të Ohrit. Drejtoresha Hoxha thotë se nuk ndihet kompetente për veprimet e ndërmarra të ministrisë para nëntorit të kaluar kur edhe u hap Instituti.