Presidenti i Federatës Italiane të Futbollit, Giancarlo Abete, ka shpjeguar se selektori i Italisë, Roberto Donadoni, do ta vazhdojë marrëveshjen me Federatën dhe do të qëndrojë në pozitën e selektorit edhe për dy vite të tjera.

“Donadoni e ka vazhduar kontratën e tij dhe do të mbetet në pozitën e selektorit të reprezentacionit të Italisë në futboll. Gjatë mëngjesit të sotëm u takova me Donadonin dhe gjatë disa ditëve të ardhshme, duhet të takohemi edhe njëherë dhe të nënshkruajmë marrëveshjen formale”, ka thënë Abete.

Donadoni do të nënshkruajë vazhdim dyvjeçar të kontratës, e cila do ta mbajë atë nën drejtim të kombëtares italiane deri në vitin 2010.

“Dëshiroj ta falënderoj Abeten për mirënjohjen e dhënë për mundin dhe punën time të bërë deri tani. Por, megjithatë dëshiroj t’i informoj të gjithë se nëse ekipi jonë nuk tregon rezultate të mira në Euro 2008, unë sërish do të jem i detyruar të jap dorëheqje”, ka thënë Donadoni.

Italia do të fillojë kampionatin evropian më 9 qershor, me ndeshjen kundër kombëtares së Holandës. Në grupin C janë edhe Rumania dhe Franca.