Në panairin e librit “Prishtina 2008”, shtëpia botuese “AIKD” në Prishtinë, promovoi librin “Rugova, vizioni nacional”, të autorit Vehbi Miftari. “Koncept ose bërthamë e gjithë librit, është mbështetja në një program nacional kulturor, që Rugova kishte një filozofi të veçantë të mendimit”, vlerësuan pjesëmarrësit në këtë promovim.

Për autorin Vehbi Miftari, Ibrahim Rugova ishte njeriu që i lidhte në një pikë të vetme të kaluarën dhe të ardhmen e shqiptarëve, në një të sotme, që është vetëm një moment që përfshinë gjithë përmasën historike, sikur dhe që përfshin të ardhmen e njerëzimit.

Në vlerësimin e tij, kryetari i KK të Prishtinës, Isa Mustafa, tha se kjo vepër publicistike paraqet filozofinë politike të Ibrahim Rugovës.

“Siç e thotë vet autori, libri “Rugova, vizioni nacional”, synon të argumentojë se përballë sfidës të madhe kapërcimit në utopi ose mosrealizimit praktik, programi politik i Ibrahim Rugovës, por edhe filozofia e papërsëritshme e viteve ‘90 në Kosovë, nuk kanë krijuar derivatin veprues të një lëvizje të gjerë për liri”, ka thënë Mustafa.

Vet autori i librit, Vehbi Miftari, thotë se koncepti i këtij libri është mbështetja në një program nacional kulturor të Ibrahim Rugovës. Për Miftarin, koncepti rugovian, nuk përfaqëson vetëm mendimin politik.

“Për mua koncepti rugovian përfaqëson mbi të gjitha atë që quhet rikthim në vlerat origjinale, rindërtim të shenjave identitare, nacionale dhe kulturore dhe më tej artikulim të tyre, i cili vazhdon të jetojë edhe sot”, thotë Miftari.

Vepra e re publicistike “Rugova, vizioni nacional”, është ndarë në tre pjesë: Ibrahim Rugova idealiteti, vizionari-vizionariteti 2, dhe Rugova vizioni nacional.

Në panairin e librit “Prishtina 2008”, shtëpia botuese “Uegen” nga Tirana, promovoi disa tituj të rinj librash, si dhe shtëpia botuese “Fokus”, në Prishtinë, ka promovuar librin “Çabej”, të autorit Begzad Baliu.