Mbrojtësi Gerard Pique, ka thënë pas transferimit të tij tek klubi spanjoll Barcelona, se synim i tij tek klubi i ri është të fitojë trofe.

Pique, i cili si pjesëtar i Manchester United gjatë sezonit të sapo mbaruar ka fituar dy trofe, Premierligën dhe Ligën e Kampionëve, thotë se kthehet tek klubi tek i cili edhe e filloi karrierën me qëllim që të fitojë trofe të tjera.

“Ëndërr e imja është ta fitoj ligën e Spanjës, Ligën e Kampionëve dhe të gjithë titujt e mundshëm. Njerëzit gjithmonë do t’i mbajnë mend arritjet të cilat i bën”, ka deklaruar Pique.

Pique ka qenë pjesë e ekipit junior të Barcelonës, së bashku me Lionel Messi, ndërsa tash thotë se ka sërish nderin të luajë me argjentinasin, kësaj here në ekipin e parë të Barçës.