Me vendosjen e linjave të rregullta të autobusit me qendrat ballkanike, por edhe me qendra turistike italiane, qytetarët e Ohrit do të orvaten të rrisin numrin e mysafirëve gjatë sezonit turistik.

Kështu, shumë qytetarë nga qyteti i Hercegnovit në Mal të Zi kanë shprehur dëshirë t'i kalojnë pushimet verore në Ohër. Agjencitë turistike thonë se fillimisht kanë prekur pulsin e qytetarëve malazez të cilët në numër të madh erdhën në Ohër gjatë festave të majit dhe të pashkëve. Ka pasur edhe vizita të shumta të punëtorëve turistik të Ohrit në Mal të Zi dhe në fund është marrë vendimi. Vizitorët nga Mali i Zi për në Ohër do të udhëtojnë përmes Shqipërisë.

"Kur ishim në Mal të Zi dhe kontaktuam me disa agjenci turistike, me disa stacione të autobusëve atje, pamë se ekziston interesim edhe i palës tjetër për të ardhur në Ohër. Tjetër qendër turistike verore nuk ka. Ohri është numër një. Shpresojmë se do të sjellin në Ohër numër të konsideruar turistësh nga Mali i Zi", deklaroi Dimitar Vasileski, menaxher në SHA "Galeb" në Ohër.

Në favor të kësaj është edhe e dhëna se përveç linjave te rregullta ajrore nga Lubjana, Viena, Dyzeldorfi, Cyrihu dhe Amsterdami drejt Ohrit, në aeroportin Shën Apostol Pali gjatë gjithë sezonit turistik është paralajmëruar edhe arritja e shumë turistëve me fluturime çarter. Gjatë këtij sezoni risi do të jetë linja e drejtë për drejtë ajrore Tel Aviv – Ohër. Grupi i parë i turistëve izraelit e përfundoi vizitën e parë fundjavën e kaluar. Deri në mbarim të korrikut planifikohen edhe 8 fluturime nga Izraeli, kurse deri në vjeshtë janë konraktuar vizita të rregullta nga Holanda.