“Zhvillimi ekonomik dhe proceset integruese janë prioritet i Qeverisë së Kosovës. Për tu arritur kjo Kosova duhet të jetë një vend atraktiv për tërheqjen e investimeve të huaja në vend”. Kështu thanë zyrtarët më të lartë vendorë sot në hapjen e panairit të përgjithshëm ndërkombëtar “Prishtina 2008”.

Në hapjen solemne të panairit mori pjesë udhëheqja me e lartë e Republikës së Kosovës. Me këtë rast presidenti Fatmir Sejdiu, tha se panairi i sotëm është promovim i vlerave prodhuese të Kosovës dhe garantoi komunitetin e biznesit kosovar që institucionet do të jenë mbështetëse dhe promovuese të politikave të reja të zhvillimit më dinamik të Kosovës.

“Zhvillimi ekonomik i një vendi është i pamundur pa një ambient të mirëfilltë ekonomik si parakusht për investime serioze të investitorëve vendorë dhe ndërkombëtarë”, tha kryeministri Hashim Thaçi i cili premtoi se Qeveria e Kosovës do të përkrah proceset integruese dhe zhvillimin ekonomik të vendit dhe do të inkurajojë komunitetin e biznesit për tërheqjen e investimeve të huaja në Kosovë.

Panairi " Prishtina 2008" është panair tradicional i cili përkrah zhvillimin e bizneseve vendore dhe integrimet ekonomike. Në panair po marrin pjesë mbi 100 prodhues vendorë dhe ndërkombëtarë të cilët prodhimet e tyre do t’i ekspozojnë deri me 6 qershor.