Trajneri i klubit basketbollistik të NBA-së, Detroit Pistons, Flip Saunders, është shkarkuar nga detyra edhe pse e kishte dërguar ekipin deri në finale të Konferencës Lindore për të tretin sezon.

“Vendimet si ky janë të vështira për t’u marrë, veçanërisht pas sukseseve që kemi pasur në tre sezonet e fundit. Sidoqoftë, këtë herë ndjej se është e domosdoshme të bëhen ndryshime. E falënderoj Flip për punën dhe dedikimin e tij, por është koha për një zë të ri që do të udhëheqë ekipin tonë”, ka thënë presidenti, Joe Dumars.

Detroit fitoi në Divizionin qendror me numër rekord, prej 59 fitoreve kundrejt 23 humbjeve këtë sezon dhe arriti në finale të Konferencës Lindore, ku u mposht nga Boston Celtics pas gjashtë ndeshjesh play-offi.

Saunders, i cili ishte emëruar trajner në 21 korrik të vitit 2005, ka pasur një rekord prej 176 fitoreve kundrejt 70 humbjeve gjatë tri viteve sa ka drejtuar Detroitin. Sidoqoftë klubi dështoi të arrijë në finale të NBA-së gjatë zotërimit të Saunders.