Drejtori teknik i Interit, Marco Branca, ka zbuluar se menaxheri i ri, Jose Mourinho, nuk është duke kërkuar sulmues të ri, duke përjashtuar qartas një kalim të Didier Drogbas nga Chelsea tek kampioni italian.

Mourinho është konfirmuar në stolin e menaxherit të Interit më herët gjatë kësaj jave dhe tashmë ka pranuar se mund t’i drejtojë sytë kah Stamford Bridge, për të transferuar disa ish-lojtarë të tij.

“Mourinho nuk na ka kërkuar ndonjë sulmues. Do të ketë vetëm disa arritje, pasi që ne tashmë kemi një ekip të mrekullueshëm. Mourinho nuk ka pyetur për shumë lojtarë, dy ose tre lojtarë më së shumti”, ka thënë Branca për Daily Mirror.

Në mesin e emrave tjerë të Chelseat që lidhen me kalim tek Interi janë edhe Michael Essien, Frank Lampard, Ricardo Carvalho dhe Ashley Cole.