Sipas burimeve në Itali, sulmuesi i Arsenalit, Emmanuel Adebayor, është pajtuar t’i bashkohet skuadrës së Milanit, ndërsa krejt çka ka mbetur është pagesa prej 40 milionë eurosh të cilën duhet t’ia paguajnë kuqezinjtë Arsenalit.

Dihet se Milan ka shënjestruar shumë emra të mëdhenj për ta përforcuar sulmin për sezonin e ardhshëm, derisa para disa javësh trajneri, Carlo Ancelotti, kishte thënë se së shpejti skuadra do të nënshkruante me njërin nga emrat e mëdhenj të sulmit, si Samuel Eto’o, Didier Drogba, Adebayor ose Amauri.

Meqenëse i fundit i është bashkuar Juventusit, mbeten vetëm tri opsionet e para, mirëpo sipas burimeve në Itali, vendin e sulmuesit në Milan do ta plotësojë Adebayor.

Adebayor ka arritur marrëveshje personale me drejtuesit Milanit, ndërsa Milanit i mbetet ta paguajë çmimin prej 40 milionë dollarësh të cilin e kërkojnë topçinjtë, çmim ky i cili, sipas Silvio Berlusconit dhe Adriano Gallianit, duhet të zvogëlohet. Sido që të jetë drejtuesit e Milanit kanë premtuar se këtë sezon do të shpenzojnë shumë për ta përforcuar klubin dhe ky çmim si duket s’do të jetë problem.

Tanimë Milanit i është bashkuar Mathieu Flamini si transfer i lirë, derisa Aliaksandr Hleb duket se së shpejti të largohet, nëse edhe Adebayor e braktisë Arsenalin, kjo do të jetë një goditje e rëndë për sezonin e ardhshëm të topçinjve.