Milan ka në dorë edhe një mundësi për pjesëmarrje në Ligën e Kampionëve, pasi që ekipi rumun Steaua Bukuresht është në prag të eliminimit nga kjo garë, gjë që do t’u hapte rrugën e pjesëmarrjes së rosonerëve.

Rumunët rrezikojnë të përjashtohen nga Liga e Kampionëve për shkak të supozimeve për montim të ndeshjeve në ligën e tyre vendore.

Steaua tashmë është ndëshkuar nga autoritetet dhe presidenti i klubit është akuzuar për shkak të montimit të ndeshjeve. Ai supozohet se ka paguar afro 2.6 milionë dollarë një ekipi tjetër rumun për t’i ndihmuar ekipit të tij të fitojë ligën.

Nëse kjo vërtetohet, si edhe Porto, ata do të përjashtohen edhe nga pjesëmarrja në garat e UEFA-së. Vendi i këtij ekipi do t’i ofrohet Dinamo Bukureshtit, por ky klub së fundi e ka bërë të qartë se nuk dëshiron të luajë në Ligën e Kampionëve.

Në këtë rast do të ishte Milani që do të fitonte pjesëmarrjen në Ligën e Kampionëve, për shkak të renditjes më të lartë në mesin e ekipeve që nuk participojnë në këtë garë.