Një tjetër çmim i shkon Agim Sulajt për karikaturën. Në përvjetorin e njëzetepestë të festivalit të karikaturës Aydin Dogan International Caricature Competition, i mbajtur në Antalya të Turqisë, karikaturisti i njohur shqiptar, Agim Sulaj, u rendit i dyti, duke marrë çmimin në vlerë prej pesë mijë dollarë.

Siç njofton gazeta turke "Hurryet", çmimi i parë, në vlerë prej tetë mijë dollarë, qëndroi brenda kufijve të Turqisë, i cili iu dha karikaturistit turk Ahmet Ozturklevent, ndërsa çmimin e tretë e mori karikaturisti austriak Gerhard Gepp, duke fituar bashkë me çmimin edhe 3500 dollarë. I konsideruar si një prej festivaleve më prestigjioze në botë të karikaturës, Aydin Dogan International Caricature Competition këtë vit mblodhi 2665 karikatura nga 971 artistë të 79 shteteve. Fillimisht, komisioni i parë i zgjedhjes kishte përzgjedhur 189 karikatura nga 161 karikaturistë prej 57 shteteve, të cilat ia ka propozuar jurisë ndërkombëtare, në përbërje të së cilës ishin një sërë personazhezh të njohur në art. Këtë vit janë paraqitur tema nga politika, të drejtat e njeriut, lufta dhe paqja. Veprat e fituesve do të ekspozohen në IC Hotels Airport prej 4 deri më 10 qershor, ndërkaq fituesit do t'i marrin shpërblimet e tyre në një ceremoni që do të mbahet në tetor në Stamboll. I lindur në vitin 1960 në Tiranë, Agim Sulaj është njëri prej karikaturistëve më të njohur shqiptarë, fama e të cilit tashmë ka depërtuar edhe jashtë kufijve të Shqipërisë.

(a.r-Gazeta Shqitare/Balkanweb)