Jeta është e mbushur me personazhe dhe role nga më të ndryshmet. Nëse bën të tjerët të vuajnë kur je nuse, kur të bëhesh vjehrrë, do të jesh ti ajo që vuan. Për këtë arsye, duhet të përdoret logjika, as mos vuaj e as mos bëj që të vuajnë...

Le të ndjekim dialogjet e mëposhtme, për të vazhduar më tej me komentin tonë...

Dy bashkëshortët:
Burri: Ra dera? Kush mund të jetë?
Nusja: Kush tjetër përveç nënës tende.
Burri: Si the? Nuk të kuptova...
Nusja: Ç’ka këtu për të mos u kuptuar?! Përsëri mamaja jote erdhi...
Burri: Mos e ngri zërin, do të të dëgjojë...
***
Nëna : Shpirti mamit, po kaloja këtej dhe thashë t’ju shikoj një herë. Shpresoj të mos ju kem shqetësuar..
Djali: Ç’është ajo fjalë moj mami?! Mirë e bëre që erdhe. Edhe neve na kishte marrë malli...
Nëna: Po ti moj bijë, çfarë ke që nuk flet? Mos je gjë sëmurë?
***
Nëna: Mesa duket, nusja qenka si pa qejf. Më mirë të ngrihem. Edhe babai juaj mund të merakoset. Ditën e mirë dhe kujdesuni për veten...
Djali: Po pse kaq shpejt moj mami? Ti sapo erdhe. Të kishe ndenjur për darkë të paktën. Apo jo shpirt...
Nëna: Jo, jo, një herë tjetër. Po gjetët kohë, hajdeni ju se ju presim..

***

Sado që ngacmimet e vjehrrave janë kthyer në legjenda tashmë, në ditët e sotme rastisim edhe në nuse të tilla. Edhe pse vjehrra mund të mos i përzihet në punët e saj, jo pak nuse shqetësohen nga prania e tyre në shtëpi.

Ka shumë raste kur nuset, duke parë vuajtjet që kanë hequr nënat e tyre me vjehrrat, e kthejnë këtë çështje në diçka psikologjike duke menduar se “mjaft ka vuajtur nëna ime. Unë nuk do ta lejoj një gjë të tillë”.

Ato harrojnë se rruga më e mirë është mirësjellja, mirëkuptimi dhe toleranca. Nuset harrojnë se sot janë nuse dhe nesër do të bëhen vjehrra. Harrojnë shprehjen “Ç’të mbjellësh, do të korrësh”.

Besoj se asnjë burrë nuk është i kënaqur nga keqtrajtimi i nënës së tij nga nusja. Nga ana tjetër, një grua e mirë, duhet të bëj të pamundurën që të mos e mërzisë bashkëshortin e saj, gjë kjo e ndërsjelltë.

Ka edhe raste kur nuset mendojnë se “Sa do mirë që unë të sillem, vjehrra nuk më kupton. Ajo nuk më do mua”. Është shumë e lehtë që t’i japësh mirësi atij të mirit. Vlera e njeriut qëndron në atë që është më e vështirë. Ti buzëqeshësh edhe atij që të keqtrajton ...