Qeveria e Kosovës po angazhohet për krijimin e politikave fiskale të cilat do të lehtësojnë depërtimin e prodhimeve të tyre në tregun ndërkombëtar. Kështu tha kryeministri i Republikës se Kosovës Hashim Thaçi, me rastin e hapjes së panairit ndërkombëtar “ Panairi i Bujqësisë dhe Ushqimit 2008”,në të cilin po marrin pjesë më shumë se 80 kompani nga Kosova dhe vendet e ndryshme të rajonit dhe më gjerë.

Qeveria e Kosovës e ka prioritet rritjen ekonomike e cila
do të ndikojë drejtpërdrejt në uljen e papunësisë, mirëqenies dhe siguron qëndrueshmëri sociale, tha kryeministri Hashim Thaçi .

“Kështu ne do t’i kryejmë të gjitha obligimet të cilat dalin në përputhshmëri më kushtetutën dhe nevojat e agrobiznesit kosovar. Bujqësia është një hallkë shumë e rëndësishme për rritje ekonomike në Kosovë. Ne do të angazhohemi si qeveri për krijim të politikave që lehtësojnë depërtimin e prodhimeve tona në tregun ndërkombëtar, kështu do të nisim procesin për të ndryshuar gjendjen aktuale jo favorizues që e kanë prodhuesit tanë me vendet tjera”, tha Thaçi.

Ndërkaq, ministri i bujqësisë Idriz Vehapi, tha se prodhuesit vendorë dhe ata të rajonit po i promovojnë sot në vendin tonë prodhimet ushqimore dhe pijet e tyre të bindur se sigurimi i ushqimit për vendin dhe rajonin është një sfidë e madhe për mbarë njerëzimin.

“Në edicionin e shtate të këtij panairi ku kanë ekspozuar më radhë prodhimet e tyre bujqësore nga vendi dhe rajoni, po theksoj me këtë rast se sivjet vetëm nga Egjipti janë duke marr pjesë 10 kompani dhe kjo tregon për një aktivitet te ngjeshur që është duke u bërë në rritjen e veprimeve përmbajtsore në përmbushjen e objektivave në shumë sektorë të bujqësisë”, tha Vehapi.

Ndërkaq, kryetari i Aleancës Kosovare të Agrobiznesit Agim Deshishku tha se kjo aleancë, e cila është organizatore e panairit që nga themelimi i saj, ka kontribuar në zhvillimin ekonomik dhe plasimin e prodhimeve vendore në tregun ndërkombëtar. Pikërisht edhe në këtë vit kemi bërë zgjerimin e pjesëmarrësve në panair nga vendet e ndryshme në mënyrë që të ndikojmë në promovimin e prodhimeve tona.

Hasan Muahamed Halim nga Egjipti thotë se është hera e parë që kompania e tij merr pjesë në një panair në Kosovë dhe se organizimi i panairit i ka lënë përshtypje të mirë. Përveç Egjiptit, në panair po marrin pjesë edhe përfaqësues të vendeve tjera të rajonit si Serbia , Maqedonia Shqipëria dhe Bullgaria. Panairi do të jetë i hapur tri ditë.