Një gjuajtje e lirë e shndërruar në gol nga kapiteni Michael Ballack, i siguroi Gjermanisë fitoren minimale prej 1-0 ndaj nikoqirit të Euro 2008, Austrisë, në rundin e fundit të ndeshjeve grupore, të grupit B.

Falë kësaj fitoreje, Gjermania siguron një vend në çerekfinalen e këtij kampionati evropian, derisa Austria ndjek hapat e nikoqirit tjetër, Zvicrës, duke u përjashtuar nga gara e mëtejme.

Ballack shënoi një gol të fuqishëm nga 26 metra largësi, katër minuta pas fillimit të pjesës së dytë (49’), i cili ishte edhe goli i parë në Euro 2008, i shënuar nga gjuajtja e lirë.

Fitore me të njëjtin rezultat, 1-0, ka shënuar edhe Kroacia duke eliminuar Poloninë nga gara e mëtejme. Ivan Klasnic, i cili kaloi 13 muaj jashtë fushe për shkak të disa problemeve shëndetësore, ishte golashënuesi i vetëm i kësaj ndeshje (52’).

Kroacia do të përballet me Turqinë në Vjenë gjatë të premtes, në kuadër të ndeshjes së parë çerekfinale, derisa Gjermania me fitoren e fundit, siguron përballjen me Portugalinë.