Rusia ka bërë paraqitjen më të mirë në Euro 2008 në momentin më të nevojshëm, duke mposhtur Suedinë me rezultat 2-0, për të siguruar kështu vendin e dytë në grupin D si dhe vend në çerekfinale, ku do të takohet me Holandën.

Rusia, duhej të fitonte për t’u kualifikuar më tej, derisa barazimi do të ishte i mjaftueshëm që skandinavët të kalonin në çerekfinale.

Por rusët ia dolën për mrekulli që nga fillimi i ndeshjes dhe arritën tek fitorja me dy gola të shënuar nga një në secilën pjesë. Goli i parë erdhi nga Roman Pavlyuchenko, pas 24 minutash lojë, derisa rezultatin e vulosi Andrei Arshavin në minutën e 50-të të ndeshjes.

“Luajtëm shumë mirë, sulmuam shumë mirë. Kur ishim 1-0 mendova se do të tërhiqemi prapa ca, gjë që nuk më pëlqen, por kur e arritëm edhe golin e dytë mendova se mund të shënojmë edhe më shumë”, ka thënë Arshavin pas ndeshjes.

Spanja përmbys rezultatin me Greqinë

Kryesuesi i grupit D, Spanja, ka arritur të përmbysë disavantazhin prej 1-0 për të shënuar fitore prej 2-1 në momentet e fundit të ndeshjes përballë kampionit aktual evropian Greqisë, që eliminohet nga faza e grupeve në mënyrën më të turpshme.

Angelos Charisteas dërgoi në epërsi grekët tre minuta para fundit të pjesës së parë, por spanjollët së pari barazuan me anë të Dani Guiza, pas një ore lojë, ndërsa pastaj arritën tek trepikëshi me anë të Ruben de la Red dy minuta para fundit të kohës së rregullt të ndeshjes.

Humbja e len Greqinë në pozitën e fundit pa asnjë pikë të marrë, derisa Spanja kryeson grupin me të gjitha pikët e fituara, 9. Rusia mbledh 6 pikë dhe mban vendin e dytë, derisa Suedia e përfundon kampionatin evropian me 3 pikë në vendin e tretë të grupit D.

Nesër do të luhet ndeshja e parë gjysmëfinale, ajo mes Portugalisë dhe Gjermanisë.