PËRMET – “Përmeti multikulturor” quhet festivali ndërkombëtar që do të zhvillohet nga datat 23 deri në 25 Qershor të këtij viti në Përmet. Ky festival, i cili është i vetmi festival ndërkombëtar i pakicave etnike, kulturore dhe gjuhësore, do të organizohet në qytetin e Përmetit, pasi është qendër e një diversiteti kulturor, ku bashkëjetojnë dhe ballafaqohen kulturat e etnive të ndryshme.

Organizatorët e këtij festivali janë seksioni shqiptar i CIOFF-it në Përmet, në bashkëpunim me pushtetin vendor dhe me shoqatën e biznesit të qytetit të Përmetit.
Në këtë veprimtari multikulturore do të organizohen jo vetëm koncerteve të grupeve pjesëmarrëse në sheshin e qytetit, por edhe veprimtari të tjera, si simpoziume, ekspozita, promovime botimesh, etj, të cilat do të gjallërojnë jetën kulturore të Përmetit dhe zonave rreth tij, duke nxitur frymën e paqes dhe të dashurisë mes grupeve etnike e popujve të rajonit. Synim i kësaj veprimtarie është edhe nxitja e turizmit kulturor si dhe gjallërimi i biznesit vendas.