Kombėtarja e Spanjės ka arritur ta shkatėrrojė pėr tė dytėn herė nė kėtė kampionat evropian kombėtaren e Rusisė, duke e mposhtur kėsaj here me rezultat 3-0, dhe duke siguruar vend nė finale, ku do tė ndeshet me finalistin tjetėr, Gjermaninė.
Pjesa e parë
Pjesa e parë e ndeshjes përfundoi pa gola, me raste në të dyja anët. Edhe pse rusët dominuan lehtë me mbajtjen e topit, ishin spanjollët ata të cilët kërcënonin më tepër portën kundërshtare.
Ajo që vlen të ceket sa i përket pjesës së parë ishte ndërrimi i detyruar i David Villas (33) për shkak të lëndimit, ndërsa në vend të tij u inkuadrua ylli i Arsenalit, Cesc Fabregas.
Pjesa e dytë
Me të filluar pjesa e dytë mesfushorët e Barcelonës, Iniesta dhe Xavi, nxjerrin jashtë loje mbrojtjen ruse, ndërsa ky i fundit e plason topin në rrjetë, duke i sjellë avantazhin e Spanjës (minuta e 50-të).
Trajneri Hiddink reagon menjëherë duke larguar nga loja dy mesfushorët, Saenko dhe Semshov, ndërsa në vend të tyre inkuadrohen sulmuesi, Sychev dhe mesfushori, Bilyaletdinov.
Nga ana tjetër Torres vazhdonte me rastet e humbura. Ndoshta ishte kjo arsyeja që Aragones e nxori nga loja sulmuesin Liverpoolit dhe në vend të tij inkuadroi sulmuesin tjetër spanjoll, Dani Güiza. Bashkë me Torres nga loja doli edhe shënuesi i golit të parë, Xavi, ndërsa në vendin e tij e zuri mesfushori Xabi Alonso.
Në minutën e 73-të, i sapoinkuadruari në lojë, Güiza, shënoi golin e dytë për spanjollët duke paraboluar portierin rus, Akinfeev. Spanja nuk pati të ndalur deri në fund të takimit, dhe arriti ta shënojnë edhe golin e tretë përmes David Silva, shtatë minuta para fundit të kohës së rregullt (83).
Kjo është fitorja e dytë e Spanjës ndaj Rusisë në këtë kampionat evropian. Kujtojmë se dy kombëtaret bënin pjesë në të njëjtin grup, atë D, dhe gjatë përballjes së parë Spanja shënoi fitore prej 4-1, me hat-trick të David Villas.
Gjermania dhe Spanja do të takohen në finalen e madhe në mbrëmjen e të dielës.
