Jo çdo gjë që shkëlqen është flori, na mëson mençuria popullore dhe jo çdo gjë që është amerikane, është demokratike dhe e pastër, po na mëson eksperienca. Forumet e shqiptarëve në botë në web janë përplot me opinione lidhur me këtë gjë, duke sjellë argumente bindëse që shqiptarët duhet të mësohen njëherë e mirë të mos hutohen nga gjërat që “shkëlqejnë”.

Dukej sikur këto vitet e fundit fjala magjike ishte bërë Amerikanë e Amerikë për të “zhdoganuar” çdo lloj hile. Por demokracia amerikane është në piedestalin e demokracive, jo sepse është shoqëri perfekte dhe e pagabueshme, por se sistemi demokratik i bazuar në ligj, nxjerr në dritë të diellit çdo lloj hile të tentuar që nga Presidenti e deri të evazori më i vogël i skajit më të humbur. Historia amerikane ka nxjerrë në sy të të gjithëve skandale që kanë rrëzuar Presidentë e mafiozë; ndër më të freskëtat kujtojmë leximet në Kongres dhe të ADN-së si në rastin Klinton-Levinski dhe është pikërisht ky sistem transparent që e bën të jetë ndër shtetet më të fortë në botë. Thënë kjo, s’na mbetet veç të presim hetimin e hollësishëm të përfshirjes së Shqipërisë e SHBA-ve në allishverishin e tregtisë së fishekëve të vjetër ‘Made in China’ drejt Afganistanit, në kundërshtim me ligjet e Shteteve të Bashkuara. E s’na mbetet tjetër veç të lexojmë shkrimin e radhës të një gazete të madhe që zbuloi e po ndjek këtë histori, “New York Times”. Në pistë janë të gjithë: Pentagoni, sipërmarrësi amerikan, ambasada amerikane në Tiranë, qeveria shqiptare, sipërmarrësi shqiptar, dhe ata, viktimat e Gërdecit, hyrë në këtë mes si filtrimi më tragjik i një pune të pistë.
Askush nuk është i përjashtuar dhe hetimi vazhdon edhe në këto ditë të nxehta korriku. Edhe në Shqipëri.

Nga Alba Malltezi /ballkanweb