Numri 10 më i pëlqyer në kryeqytetin italian, Francesco Totti, është duke vazhduar të punojë në rikuperimin e tij, ndërsa sot u është bashkëngjitur bashkëlojtarëve të tij në stërvitje.

Asi i Giallorosëve sot është kthyer në fushën stërvitore të skuadrës, në Trigoria. Kapiteni është duke e vazhduar procesin e rehabilitimit pas ndërhyrjes kirurgjike në gjurin e djathtë në prill të këtij viti.

Brenda disa ditësh, Tottin do ta vizitojë kirurgu i tij, Pierpaolo Mariani, i cili do ta caktojë shkallën e rikuperimit.

Që në javën e ardhshme Grande do të fillojë rritjen graduale të ngarkesës në stërvitje me qëllim që t’i forcojë muskujt dhe të testojë reagimin e nyjave të tij.