Vajza më e bukur nga Venezuela, Dayana Mendoza është kurorëzuar më titullin “Miss Universe 2008”, në garën e bukurisë që është mbajtur në Nha Trang të Vietnamit. Përfaqësuesja e Kosovës në këtë garë, Zana Krasniqi, ka arritur të futet në mesin e 10 vajzave më të bukura nga 80 sosh sa kanë garuar në këtë garë të bukurisë.

Përcjellësja e parë është zgjedhur Miss Colombia, Taliana Vargas, ndërsa përcjellësja e dytë, bukuroshja nga Republika Domenikane, Marianne Cruz Gonzale. Në mesin e pesë vajzave më të bukura janë përzgjedhur edhe Miss Meksika, Elisa Najera dhe Miss Rusia, Vera Krasova.

“Miss Universe”, Dayana Mendoza është 22-vjeçare ndërsa ëndrra e saj është të bëhet dizajnere e enterierit. Ajo merret edhe me fotografi ndërsa ka interesim edhe për fushën e marketingut.

Juria e Miss Universe ishte e përbërë nga emrat e njohur si; Donald Trump Jr. (nënpresident ekzekutiv i kompanisë Trump Organization); Roberto Cavalli (dizajner i modës); Nadine Velazquez (yll i televizionit NBC); Jennifer Hawkins (prezantuese televizive dhe Miss Universe 2004) etj.

Gjatë garës së bukurisë, që ka zgjatur dy orë, bukuroshet nga 80 vende të ndryshme botërore kanë garuar në tri kategori: rroba banje, fustane solemne dhe në intervista mbi personalitetet e tyre.

Fituesja Mendoza, pos kurorës Miss Universe, që ka vlerë 30 mijë dollarë, ka fituar edhe një mori shpërblimesh të tjera, si: Shkollimin në Akademinë e Filmit në New York, që kapë vlerën prej 100 mijë dollarë, pastaj veshmbathjet dhe kozmetikën nga firmat më të famshme botërore, pjesëmarrje në fushatat e marketingut e deri të fotosesione të fotografi i njohur shqiptar që jeton në Amerikë, Fadil Berisha.

Kjo garë e bukurisë, sipas mediave botërore, është përcjellë nga 1 miliard teleshikues. /Telegrafi/