18 biznesmenë turq, njëkohësisht edhe anëtarë të Shoqatës qytetare “Prizrenliler” në kuadër të forumit të biznesit që po mbahet në Maqedoni, treguan interes për mundësit që ofron Maqedonia në biznes.

“Jemi këtu së bashku me përfaqësuesit e 18 kompanive turke, me qëllim që të nxisim më tej marrëdhëniet e mira mes vendeve. Në përgjithësi kemi përfaqësues të kompanive që merren me ndërtimtari, industrinë e tekstilit dhe automobilave. Kohë më pare nëpër mjetet e informimit në mbarë Turqinë kishte një reklamë përmes së cilës, u bëhej thirrje kompanive turke të investojnë në Maqedoni dhe përparësitë që shteti juaj ofron ka tërhequr vëmendjen e shumë biznesmenëve nga Turqia”, tha kryetari i OJQ “Prizrenliler” Nezih Liman.

“Bashkëpunimi mes dy shteteve sa vjen e rritet dhe unë mendoj se me anë të organizimit të takimeve të tilla mund të arrihet një mbështetje e madhe nga ky aspekt”, shtoi këshilltari për tregti në ambasadën turke në Maqedoni Hakan Kizartici.

Forumi i biznesit po mbahet me iniciativë të OJQ-së Prizrenliler nga Turqia e cila përbëhet kryesisht nga mërgimtarë nga Maqedonia dhe Kosova. Gjatë vizitës së biznesmenëve nga Turqia pritet që të lidhen edhe marrëveshje për bashkëpunim me kompanitë e këtushme.