Albanologu kanadez Robert Elsie e pasuron “ditarin on line” me 13 artikuj të rinj për Historinë e Shqipërisë.Në www.albaniahistory.net lexuesi gjen autorë me peshë të huaj, të traditës dhe bashkëkohës, udhëtarë e kronistë që përshkruajnë çfarë kanë parë me sy dhe çfarë dinë nga studimi i historisë së Shqipërisë dhe shqiptarëve.

Janë dokumente ku flitet për përmendjet e para të shqiptarëve deri tek temat e mëdha historike si për shembull për Lidhjen Shqiptare të Prizrenit, për Deklaratën e Pavarësisë së Shqipërisë, për Kongresin e Triestes apo për çështjen çame.

Sipas mbledhësit të tyre, “ky koleksion tekstesh synon të hedhë më shumë dritë mbi këtë kënd të Evropës Juglindore i cili shpeshherë keqkuptohet nga historianët dhe shkencëtarët. Kjo faqe interneti nuk është një histori e Shqipërisë dhe as një histori e shqiptarëve, por thjesht një përmbledhje tekstesh historike - disa me shumë rëndësi dhe disa me më pak rëndësi - nga shekulli i njëmbëdhjetë deri në shekullin e njëzetë, të cilat do të shërbejnë për të kuptuar më mirë historinë dhe zhvillimin e Shqipërisë dhe të popullit të saj.”