Për herë të parë, një vepër e artistit shkodran me famë botërore mbërrin në qytetin e tij të lindjes. Profili i një burri, kompozuar nga fundi i shekullit të kaluar është skica, që prej dy ditësh ekspozohet në Galerinë e Arteve të Shkodrës.

Këtë e ka mundësuar skulptori i talentuar, shkodrani Genti Tavanxhi, i njohur si mik i Delisë dhe koleksionist i veprave të artit. Tashmë puna e të madhit Lin Delija do të qëndrojë përkrah punimeve të emrave të mëdhenj të pikturës shkodrane si të Kolë Idromenos, Zef Kolombit, Andrea Kushit, Simon Rrotës, Jakup Kerajt etj. Iniciator i kësaj vepre bamirësie ka qenë një tjetër artist shkodran, skulptori Gent Tavanxhi, i cili jo vetëm që e ka njohur nga afër në Itali piktorin Delija, por ai njihet edhe si koleksionist i veprave të tij. Për drejtuesit e kësaj galerie, shembulli i Tavanxhiut shpresohet që të ndiqet edhe nga qytetarë të tjerë shkodranë, të cilët do t'i dhurojnë vepra të tilla nga artistë të mëdhenj, kur dihet se mundësitë financiare të saj, për të blerë vepra të tilla janë të kufizuara. Në ambientet e galerisë, në prani të familjarëve të piktorit Delija, artistëve e artdashësve u organizua ceremonia e dhurimit të veprës.

Aktiviteti u zhvillua pasditen e së mërkurës në Galerinë e Arteve në Shkodër. Në fjalën e hapjes së këtij takimi, drejtori i galerisë, piktori Artan Draçini, u shpreh për të madhin Lin Delija se ai qe një mjeshtër për transmetimin e vlerave të qëndrueshme të pikturimit nxënësve të tij, mjeshtër për nivelin e lartë të krijimtarisë dhe kompetencës teknike. Tavanxhi mësohet se disponon në koleksionin e tij disa vepra të Delisë dhe prej më shumë se një viti pati premtuar se do t'i dhurojë galerisë një prej tyre. Vetë pohoi se piktori i famshëm Lin Delija ka pasur dëshirë që punimet e tij të jenë dhe në Shkodër. "Kjo ka qenë dëshirë e vetë atij, që kur ishte gjallë, që veprat e tij të ekspozoheshin në ambiente publike. Shpresoj që dhurata e sotme t'i hapë rrugën dhurimeve të tjera të veprave për galeri publike si dhe të tërheqë vëmendjen e Bashkisë Shkodër për bashkëpunim me ata që i disponojnë këto vepra", u shpreh Tavanxhi.