Struga që në këtë sezon njihet ndryshe si “qytet i poezisë” është bërë gati për të pritur 58 poetë nga 37 vende të botës në edicionin e 47 të saj festivalit poetik. Takimi i radhës ka diçka të veçantë për ne shqiptarët.

Për herë të parë Kurorën e Artë si poeti më i mirë e ka fituar një shqiptar, Fatos Arapi. Sipas traditës, më 21 gusht kur dhe çelet zyrtarisht ky edicion Fatos Arapi do të mbjellë në parkun e poezisë në Strugë një pemë. Të njëjtën gjë kanë bërë paraardhësit e tij: në parkun e fituesve kanë mbjellë një pemë e njohur si “pema e paqes”. Organizatorët, ndërkohë, thonë që një mbrëmje speciale do të mbahet të shtunën më 23 gusht në ambjentet e kishës mesjetare të Shën Sofisë në Ohër e cila do t’i kushtohet tërësisht poetit fitues të Kurorës së Artë.

Fjalën soleme rreth krijimtarisë së poetit do ta mbajë akademiku maqedonas Gane Teodorovski.

Nga Shqipëria përveçFatos Arapit do të ketë edhe poetë të tjerë. Nga Kosova vijnë Nezir Sefaj, Agim Gjakova dhe Kadrush Ragoshi, ndërsa nga Maqedonia do të jenë akademikët Luan Starova dhe Ali Aliu, poetët Zejnepe Rexhepi, Lindita Ahmeti, Vjollca Berisha etj. Kryetari i Komunës së Strugës Ramiz Merko ka thënë për gazetën se në natën e çeljes do të marrin pjesë personalitetet më të larta të vendit si dhe gjithçka është konceptuar si një spektakël dhe një festë e vërtetë popullore e mbarë artit për aq më tepër që është e para herë që këtë kurorë të artë e fiton një shqiptar.