"Importet e mallrave nga Turqia në Kosovë janë afër 100 milionë euro, ndërsa eksportet e Kosovës për në këtë vend janë shumë të vogla rreth 1 milion euro, gjë që sensibilizimi i resurseve kosovare do ta ndihmonte Kosovën për të eksportuar mallra për në Turqi, dhe njëherësh përmes kësaj pjesëmarrje do të bëhej inkurajimi i investitorët turq për të investuar në Kosovë", tha ministri Zharku.

Ministri i Tregtisë dhe industrisë, Lutfi Zharku priti në takim përfaqësuesit e Odes Ekonomike turko-kosovare, z. Turgay Şen, z.Alush Ergin dhe z.Fehmi Domaniku.
Temë e takimit ishte ftesa për organizimin e prezantimit të Kosovës në panairin e Malatjës të Turqisë.

Ky panair me interes ekonomik, që njëherësh është një panair mjaftë në zë në Turqi, do të mbahet prej 9 deri 12 tetor 2008 në këtë qytet dhe njihet si qendër e rëndësishme tregtare dhe industriale e Anadollit.

Në këtë panair, siç u tha nga z.Turgay Şen, Kosovës i është dhënë një rëndësi e veçantë pasi që Kosova tani është një shtet i ri dhe po shfrytëzohet rasti për të treguar potencialet e saj në fushat ndërtimore, si dhe ofrimi i mundësive për lidhje tregtare në mes afaristëve turq dhe shqiptarë.

Në panair janë siguruar stende për bizneset kosovare dhe të gjitha shpenzimet i ka hequr Qeveria turke.

Po ashtu, ministri Zharku u zotua se në bashkëpunim me shoqatat e biznesit në Kosovë do të bëjmë organizimin dhe selektimin e ndërmarrjeve që do të marrin pjesë në këtë panair me rëndësi për afaristët kosovarë./Telegrafi/