Qytetarët shprehen të revoltuar pas kërkesës nga kompania shtetërore energjetike ELEM që i bëri Komisionit rregullator për energjetikë që çmimi i energjisë të rritët për rreth 30 %, më saktësisht nga 1.3 denarë në 1.8 denarë për kilovat orë.

Qytetarët thonë se nga pagat mujore të cilat marrin nuk arrijë të paguajnë as çmimin e deritanishëm të energjisë.

"Nuk duhet të rritet, mirëpo kur nuk ka shtet ashtu është. Te ne nuk funksionon shteti, ekziston vetëm hajnia. Do ta vjedhim nëse nuk e paguajmë, çka të bëjmë, megjithëse ne nuk mund të vjedhim ngase jetojmë në ndërtesë, ama megjithatë do të duhet ta vjedhim rrymën”, tha një qytetar i revoltuar.

"Varfëri, çka do të jetë. Pensionet e vogla ndërsa po shtrenjtohet gjithçka, le ta ndërpresin dhe fund", shtoi një tjetër pensionist.
"Kjo është trishtuese, është turp, nga njëra anë rrisin pensionet ndërsa nga ana tjetër menjëherë të marrin dhe nuk besoj se dikush do të mundë ta paguaj. Deri tani kanë qenë solid, sa aq, ndërsa tani këtë që kanë paralajmëruar 30 % nuk besoj se dikush do ta paguaj, do të ketë probleme të rënda", theksoi një tjetër.

Ndërkohë ministri i Ekonomisë Fatmir Besimi tha se institucion kompetent për përcaktimin e çmimit të energjisë mbetet Komisioni rregullator. Por ai gjithsesi paralajmëroi se në plan e sipër është realizimi i pakos sociale që do të ndihmojë familjet me asistencë.

"Kështu shfrytëzoj rastin t’ju njoftojë se gjithashtu mendohet të realizohet e ashtuquajtura pako sociale për kategorinë e shoqërisë të cilët nga aspekti social janë me gjendje të vështirë, gjegjësisht ata të cilët marrin ndihmë sociale normalisht në të ardhmen të ketë edhe mundësinë e një pakete sociale edhe për shfrytëzimin e energjisë elektrike. Mirëpo kjo është në fazë të hershme, normalisht që duhet të bëhen analiza, studime për mënyrën më efikase dhe më racionale të implementimit edhe të kësaj mase", theksoi ministri i Ekonomisë Fatmir Besimi.

Nga Komisioni rregullator njoftuan se vendimi përfundimtar rreth kërkesës së Kompanisë shtetërore ELEM për rritjen e çmimit të energjisë elektrike do të merret nga fundi i këtij muaji. Përveç ELEM-it, rritje të çmimit të energjisë elektrike deri në fund të vitit do të kërkojë edhe EVN-ja. Austriakët thonë se kërkesa për nivelin e rritjes së çmimit të energjisë elektrike do të varet nga analizat përfundimtare që është duke bërë kompania rreth shpenzimeve të EVN-së të cilat janë rritur pas ndryshimeve në ligjin për energjetikë.