Aeroporti ndėrkombėtar i Shkupit "Aleksandri i Madh, pas dy vitesh do tė marrė pamjen e njė aeroporti modern evropian
Projekti i shoqëruar me pamje vizuale u paraqit gjatë nënshkrimit të marrëveshjes për dhënien e tij me koncesion 20 vjeçar kompanisë turke me renome botërore TAV. Marrëveshjen në vlerë prej 200 milion euro e nënshkruan ministri i Transportit dhe Lidhjeve, Mile Janakievski dhe numri një i kompanisë turke Mustafa Sani Shener.
Shener tha se interesi është i dyanshëm, pasi me aeroportin të cilin do ta ndërton kompania e tij do të mburren të gjithë qytetarët e Maqedonisë, ndërsa për të nuk do të shpenzohen fonde nga buxheti i Maqedonisë.
Aeroportet janë portat e shteteve, kur një udhëtar shkon në një vend përshtypjet e para i merr nga aeroporti i atij vendi, dhe gjithashtu përshtypjet e fundit kur e lëshon atë vend, tha Mustafa Shani Shener, drejtor i TAV Aeroports.
Republika e Maqedonisë meriton një investim të tillë, që do të thotë përmirësim i shërbimeve për të gjithë qytetarët dhe për të gjithë ata që do të vijnë në Maqedoni, deklaroi Mile Janakievski, ministër i Transportit dhe Lidhjeve.
Janakievski tha se me marrëveshje janë precizuar edhe datat e realizimit të investimeve, për 12 muaj duhet të përfundojë modernizimi i aeroportit të Ohrit, për 24 muaj rikonstruimi i tërësishëm i atij të Shkupit, ndërsa për 36 muaj ndërtimi i aeroportit Kargo në Shtip. Ai premtoi se asnjë punëtorë nuk do të humb vendin e punës, ndërsa edhe shteti do të ketë përfitime të cilat do të varen nga numri i pasagjerëve.
Ashtu siç do të rritet numri i udhëtarëve gjatë 20 viteve të ardhshme, pritet që shteti nga kompensimi për koncesion të fitojë nga 30 deri 40 milion euro në vit, do të thotë në varësi nga zhvillimi i Aeroportit, përkatësisht numrit të pasagjerëve. Për momentin kemi rreth 500 mijë pasagjerë në vit, ndërsa parashikimet janë që numri i tyre të rritet prej 2 deri 3 milion gjatë 20 viteve të ardhshme, tha ministri Janakievski.
Kompania TAV e cila u paraqit e vetme në tenderin qeveritar për dhënien me koncesion të aeroporteve menaxhon tre aeroportet më të mëdha në Turqi, duke përshirë edhe më të madh atë Ataturk në Stamboll, tre aeroporte në Tunizi, dhe dy në Gjeorgji, ndërsa është duke ndërtuar aeroportet e Kajros dhe Katarit.
