U shpallën mbrëmë në Durrës, fituesit e edicionit të katërt të Festivalit Ndërkombëtar të Poezisë, “Poeteka”

Poeti portugez, Casimiro De Brito është fituesi i edicionit të katërt të Festivalit Ndërkombëtar “Poeteka”. Mbrëmë në Durrës, u zhvillua nata përmbyllëse e festivalit, gjatë së cilës u shpallën edhe fituesit e këtij edicioni. Edhe pse jo fort i njohur për lexuesin shqiptar, “Unaza e Poetekës” i shkoi poetit portugez, De Brito, autor i mbi 40 librave me poezi, esse dhe aforizma.

Librat e tij janë pjesë e 120 antologjive botërore dhe është përkthyer në 21 gjuhë. Krahas Unazës, u ndanë edhe të tjera çmime e u shpallën të tjerë fitues. Kështu, Çmimi “Liburna” u meritua nga poetesha Natasha Lako, Çmimi “Nositi” nga Lindita Arapi, ndërsa revista “Mehr Licht” u shpall si fituesja e çmimit “Criterion”.

Po dje, në ditën e fundit të festivalit, poezia u paraqit ndryshe. Poeti hollandez Arjen Duinker, zgjodhi për “skenë” shkallët e lëvizshme të një qendre biznesi në Durrës. Me performancën “Perpetum Mobile”, ai sikur risolli legjendën e përtëritur të “Hollandezit Fluturues”, që hidhte trendafilat poetikë të sjella nga trevat hollandeze. Kjo performancë e përbërë nga leximi autorial në mjediset e hapura kishte si synim afrimin e poezisë me një publik më të gjerë, të “kultivuar” ose jo me poezinë.

Kjo performancë e poetit më të njohur holandez, i përkthyer në 14 gjuhë të botës, shënoi edhe seancën e fundit të edicionit të IV –të të Festivalit Nderkombëtar të Poezisë, “Poeteka”. Organizatori i festivalit, poeti Arjan Leka, tha se këto forma të lirshme performimi janë zgjedhje vetiake e poetëve dhe bëhen për të shformatizuar poezinë, për ta nxjerrë atë nga formalina e ngrirë e për ta futur në publik. “Ne, shtoi poeti Leka, gjithmonë përpiqemi që t’iu tregojmë të tjerëve se sa i lashtë është qyteti ynë Durrësi, por krahas një lashtësie dinjitoze ne kemi edhe një vend që ecën me hapa të shpejta drejt modernes ashtu si dhe Parisi, Londra e Neë Yorku”.

Sipas organizatorëve, e veçanta e këtij edicioni ishte pranimi i “Poetekës” si strukturë në “LYRICKLINE” që është edhe rrjeti më i madh bashkëkohor i poezisë vizuale. Me pranimin në këtë rrjet, edhe “Poeteka” bëhet pjesë e programit të UNESKO-s. Një formë e veçantë e papërdorur në edicionet e tjera është edhe “Poetry film”-i. Sipaskësaj mënyre, regjisorët krijojnë një film, bazuar në një poezi. Në këtë rast teknika kinematografike përdoret si ndërmjetëse mes publikut dhe letërsisë. Gjatë këtij edicioni u shfaqën 14 filma të tillë. Poshtë ekranit, temat filmike shoqëroheshin me vargje të poezisë përkatëse. Kjo metodë ka ardhur në këtë festival si nismë e Dr. Thomas Wohlfahrt dhe si bashkëpunim i “Zebra Festival”, Berlin.